එක්සත් ජනපදයේ ශ්රී ලාංකික ප්රජාව සමඟ පැවති හමුවකදී අදහස් දක්වමින් ජනාධිපති දිසානායක මහතා කියා සිටියේ, 2019 වසරේ සිදුවූ පාස්කු ඉරිදා බෝම්බ ප්රහාරය සම්බන්ධ විමර්ශන ඉදිරියට ගමන් කරමින් පවතින බවත්, එම සිද්ධිය සම්බන්ධයෙන් හිටපු හමුදා නිලධාරීන් එක් අයකු හෝ දෙදෙනෙකු අත්අඩංගුවට ගැනීමට නියමිත බවයි. වත්මන් රජයට උරුම වූයේ දෝෂ සහිත සහ අසම්පූර්ණ විමර්ශනයක් බවත්, සත්යය අනාවරණය කර ගැනීම සඳහා නැවුම් විමර්ශන ආරම්භ කිරීමට සිදුවී ඇති බවත්ය.
“මෙම ප්රහාරවලට සැබවින්ම වගකිව යුත්තන් කවුරුන්ද යන්න හඳුනා ගැනීම කෙරෙහි විමර්ශන අවධානය යොමු කර තිබෙනවා,” යැයි ජනාධිපතිවරයා පැවසීය.
“යුක්තිය ප්රමාද වීමට ප්රධානතම හේතුවක් වන්නේ දේශපාලනයයි. බෝම්බ ප්රහාරවලට සම්බන්ධ යැයි සැකකරන පුද්ගලයන් ප්රහාරවලින් පසු බලයට පත්වුණා. ඔවුන්ගෙන් සමහරෙක් උසස් තනතුරු දැරුවා. එවැනි තත්ත්වයක් තුළ නිසි විමර්ශනයක් සිදුවේ යැයි අපට අපේක්ෂා කළ හැක්කේ කෙසේද?” යැයි ද ඔහු ප්රශ්න කළේය.
තවදුරටත් අදහස් දැක්වූ ජනාධිපතිවරයා කියා සිටියේ, මුල් විමර්ශන නොමඟ යැවීම සඳහා සාක්ෂි මකා දමා, සඟවා හෝ වෙනස් කර ඇති බවයි. මෙම පසුබෑම් තිබියදීත්, අපරාධ පරීක්ෂණ දෙපාර්තමේන්තුව කෙරෙහි තමා විශ්වාසය තබන බව ඔහු ප්රකාශ කළේය. මෑතකදී CID නිලධාරීන් අත්අඩංගුවට ගැනීම්වලින් අභ්යන්තර කඩාකප්පල්කාරී ක්රියා හෙළි වූ බව ද ඔහු සඳහන් කළේය.
“මෙය ඊයේ සිදුවූ සිදුවීමක් නොවෙයි, සංකීර්ණ හා සම්මුතිගත තත්වයන් යටතේ අපට උරුම වූවක්. නමුත් CID හැකියාව ඇති බව මම විශ්වාස කරනවා,” ඔහු පැවසීය.
“හිටපු හමුදා නිලධාරීන් කිහිපදෙනෙකු ඉක්මනින් අත්අඩංගුවට ගැනීමට නියමිත අතර විමර්ශන අඛණ්ඩව හා ඉදිරියට යමින් පවතිනවා.”
