පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන් රජයේ මුදල් පිළිබඳ කාරක සභාව (09) පාර්ලිමේන්තුවේදී රැස් විය. එහිදී මෙරට ආදායම, වියදම සහ ණය තත්ත්වයන් 2025 වසරේ පළමු භාගයට අදාලව කෙසේද යන්න පිලිබදව මුදල් පිළිබඳ සළකා බැලිණි.
මුදල් අමාත්යාංශ නිලධාරීහු මෙහිදී කාරක සභාවට දැන්වුයේ 2024 වර්ෂයේ මුල් මාස හයට සාපේක්ෂව 2025 වසරේ පළමු භාගය තුළ ලංකා රජය ශක්තිමත් මූල්ය කාර්ය සාධනයක් වාර්තාකරමින් වසර මැද ඉලක්කය ඉක්මවා ගොස් ඇති බවය. 2025 ජනවාරි සිට ජුනි දක්වා අර්ධ වාර්ෂික ඇස්තමේන්තු ගත අදායම වූයේ රුපියල් බිලියන 2,241ක් වන අතර එකතු කරන ලද මුළු ආදායම රුපියල් බිලියන 2,318 කි. එය අර්ධ වාර්ෂික ඇස්තමේන්තුව 3% කින් ඉක්මවා ගොස් ඇති බවට දත්ත ඉදිරි පත්කරමින් මුදල් අමාත්යාංශ නිලධාරීහු පෙන්වා දුන්හ.
2025 පළමු භාගයේදී රජයේ මුළු වියදම රුපියල් බිලියන 3,467කි. එම මුදල 2024 වර්ෂයේ මුල් මාස 6 තුළ මුළු වියදමට සාපේක්ෂව රුපියල් බිලයන 367කින් වැඩිවී ඇත. මෙම වැඩිවීමේ ප්රධාන සාධයක් ලෙස ණය සේවාකරණය මුලික වී ඇත. 2025 පළමු භාගයේදී එය රුපියල් බිලියන 1,984 ක් ව ඇත. රාජ්ය අංශයේ වැටුප්, විශ්රාම වැටුප්, අස්වැසුම සහ සමෘද්ධි වැනි සමාජ ආරක්ෂණ ශුද්ධ වැඩසටහන් ඇතුළු අත්යවශ්ය රාජ්ය සේවාවන් සඳහා පුනරාවර්තන වියදම් ද ඉහළ ගොස් ඇති බව මුදල් අමාත්යාංශ නිලධාරීහු පැවසුහ.
ශ්රී ලංකා රේගු දෙපාර්තමේන්තුව 2024 වර්ෂයට සාපේක්ෂව (ජනවාරි – ජුනි) 47% ක වර්ධනයක් වාර්තා කරමින් 2025 ජනවාරි සිට ජුනි අතර කාලය තුළ රුපියල් බිලියන 996 ක අදායමක් වාර්තා කර ඇත. මෝටර් රථ ආනයනයෙන් ලැබුණු ආදායම මෙම වර්ධනයට සැලකිය යුතු ලෙස හේතු වී අතර එමඟින් රුපියල් බිලියන 429 ක් ලැබී තිබුණි. වාහන ආනයනය සඳහා විවෘත කළ පසු මේ දක්වා ශ්රී ලංකාවට වාහන 220,026 ආනයනය කර ඇති අතර ඉන් වාහන 154,537ක් ශ්රී ලංකා රේගුව මගින් නිෂ්කාශන කටයුතු අවසන් කර ඇති බවද මුදල් අමාත්යාංශ නිලධාරීහු පෙන්වා දුන්හ.
බහාලුම් නිෂ්කාශන කටයුතු සඳහා රේගුවේදී දින 9 – 10 අතර කාලයක් ගත වීම හේතුවෙන් ආනයනකරුවන් මුහුණ දෙන ගැටලුවට පිළියම් සකස් කරමින් දින 2 – 3 වැනි කාලසීමාවකදී අදාළ භාණ්ඩවල නිෂ්කාශන සිදුකර අවසන් කිරීමට ක්රමවේදයක් සකස් කරමින් පවතින බව රේගු දෙපාර්තමේන්තු නිලධාරීහු කාරක සභවට දැනුම් දුන්හ.
දේශීය ආදායම් දෙපාර්තමේන්තුවේ ද (IRD) වර්ධනයක් වාර්තා කළ අතර,2025 පළමු භාගයේදී ඇස්තමේන්තු ගත අදායම වූ රුපියල් මිලියන 1,022,691 න් රුපියල් මිලියන 1,040,388කක අදායමක් වාර්තාකර තිබුණි. මෙහිදී එම දෙපාර්තමේන්තුවේ නිලධාරීහු වයස 18 වැඩි ශ්රී ලාංකිකයින් මිලියන 1.3 පමණ පිරිසකට අදාළව TIN අංකය ( Tax Identification number ) නිකුත් කර ඇති බවද පෙන්වා දුන්හ.
මෙහිදී සභාපතිවරයා, මෙම දත්ත අනුව මෙම වසරේ අපේක්ෂිත ආර්ථික වර්ධන ඉලක්කයට ගමන් කළ හැකිද යන්න කරුණු විමසමින් ප්රශ්න කළේය. කෙසේ වෙතත් මේ වසරේ ආර්ථික වර්ධනය 3.1% පමණ වනු ඇති බවට උපකල්පනය කළ හැකි බව මුදල් අමාත්යාංශ නිලධාරීහු පැවසුහ.
එමෙන්ම දුම්වැටි සඳහා භාවිතා වන බදු ප්රතිපත්තිය සම්බන්ධයේන් මුදල් අමාත්යාංශයේ ප්රතිපත්තිය මෙන්ම වර්ෂ අවසානයේ මෙරට විදේශ සංචිත පිළිබඳව ශ්රී ලංකා මහ බැංකුව හා මුදල් අමාත්යාංශය මගින් කර ඇති පුරෝකතනයන් වල පරස්පරතාව පිළිබඳවද කාරක සභාවේදී සාකච්ජා විය.
