දරුවන් වෙනුවෙන් ගෙන ඒන ලද නව පනත පාසල් හෝ ගුරුවරුන් ඉලක්ක කරමින් සංශෝධනය කරන ලද නීතියක් නොව, සමාජයේ සියලුම දරුවන්ගේ ආරක්ෂාව සහ සුරක්ෂිතතාව සහතික කිරීම අරමුණු කරගත් පුළුල් සංශෝධනයක් බව අග්රාමාත්ය සහ අධ්යාපන, උසස් අධ්යාපන සහ වෘත්තීය අධ්යාපන අමාත්ය ආචාර්ය හරිනි අමරසූරිය මහත්මිය අවධාරණය කළාය.
ඇය මෙම අදහස් පළ කළේ, නව නීති ප්රතිපාදන පිළිබඳව ජාතික පාසල්වල විදුහල්පතිවරුන් දැනුවත් කිරීම සඳහා අමාත්යාංශයේ පැවති වැඩසටහනකට සහභාගී වෙමිනි.
“මෙය හුදෙක් පාසල් ප්රශ්නයක් පමණක් නොවේ. මෙය දරුවන්ට ලබා දෙන ශාරීරික හා මානසික දඬුවම් පිළිබඳවයි. මෙම සංශෝධනය පාසල් දරුවන් පමණක් නොව, පොලිස් භාරයේ සිටින දරුවන්, ආයතනගත කර ඇති දරුවන්, අතහැර දමා ඇති දරුවන් සහ වැඩිහිටියන් හෝ වගකිවයුතු පුද්ගලයන් විසින් බොහෝ විට හිංසනයට ලක්වන සමාජයේ සියලුම දරුවන් ආරක්ෂා කිරීම සඳහායි,” යනුවෙන් අග්රාමාත්යවරිය පැහැදිලි කළාය.
ආචාර්ය අමරසූරිය මහත්මිය ප්රකාශ කළේ, මෙම සංශෝධනයෙන් විනය පාලනය තහනම් නොකරන නමුත්, එය ක්රියාත්මක කිරීමේ මාර්ගයක් ලෙස ශාරීරික හා මානසික වධ හිංසා ප්රතික්ෂේප කරන බවයි.
“දරුවන් විනයගරුක කිරීමට ඇති එකම මාර්ගය ඔවුන් ශාරීරිකව හෝ මානසිකව බිඳ දැමීම යැයි අප සමාජයක් ලෙස සිතනවා නම්, අපට සාකච්ඡා කිරීමට බොහෝ දේ තිබෙනවා. දරුවන් අපහසුතාවයට පත් නොකර, වධ හිංසා නොකර හෝ ඔවුන්ට බලපෑම් නොකර ඔවුන් නිවැරදි කිරීමට බොහෝ නිර්මාණාත්මක ක්රම තිබෙනවා,” යැයි ඇය පැවසුවාය. තවද, ධනාත්මක විනය ක්රමවේද ප්රවර්ධනය කිරීම සඳහා ඉදිරියේදී වැඩමුළු පවත්වන බවද ඇය වැඩිදුරටත් සඳහන් කළාය.
ගෘහස්ථ හිංසනය ඉහළ යාම සහ ගැටුම් විසඳීමේ ක්රමයක් ලෙස හිංසනය සාමාන්යකරණය වීම පිළිබඳව ද අවධානය යොමු කළ අග්රාමාත්යවරිය, පුළුල් සමාජ සන්දර්භයක් වෙත අවධානය යොමු කළාය.
“ගෘහස්ථ හිංසනය සිතාගත නොහැකි මට්ටමකට ඉහළ ගොස් ඇති රටකයි අපි ජීවත් වෙන්නේ. අපේ කාලයේ සුළු දෙයක් ලෙස සැලකූ හිරිහැර කිරීම් පවා අද දරුවන්ට දරාගත නොහැකි වී තිබෙනවා. හිංසනය නිවෙස් තුළට, ආයතනවලට, නේවාසිකාගාරවලට සහ ආගමික ස්ථානවලට පවා කා වැදී තිබෙනවා. මෙය අතිශයින්ම භයානකයි. ගැටුම් විසඳීම සඳහා ප්රධාන මෙවලම ලෙස අප හිංසනය පිළිගන්නේ නම්, එය අපේ සමාජයේ වටිනාකම් පිළිබඳව බරපතළ ප්රශ්න මතු කරනවා,” යනුවෙන් ඇය අනතුරු ඇඟවූවාය.
වෙනසක අවශ්යතාවය අවධාරණය කරමින් අග්රාමාත්යවරිය කියා සිටියේ, “මෙම සංශෝධනය සමාජය වඩාත් දියුණු සහ ශිෂ්ට සම්පන්න තැනකට ගෙන යාම අරමුණු කර ගෙන තිබෙනවා. එහිදී දරුවන් ආරක්ෂා කරනු ලබන අතර, විනය පවත්වාගෙන යන්නේ හිංසනයෙන් නොව, ධනාත්මක ක්රමවේද හරහායි.”
