ඇඟලුම් අපනයනය ආදායම ඉහළට

2025 වසරේ දෙසැම්බර් මාසයේදී ශ්‍රී ලංකාවේ ඇඟලුම් අපනයනය ආදායම ඉහළ ගොස් තිබේ.

සමස්තයක් වශයෙන්, දෙසැම්බර් මාසයේ දී අපනයන ආදායම 2024 වසරේ දෙසැම්බර් මාසයට වඩා ඩොලර් මිලියන 23.03 කින් වැඩි වීමක් පෙන්නුම් කරයි.

එයට ප්‍රධාන වශයෙන් හේතු වී ඇත්තේ අමෙරිකා එක්සත් ජනපදය, එක්සත් රාජධානිය සහ යුරෝපීය සංගමයෙන් ලැබුණු ඉල්ලුමේ වැඩිවීම බව සඳහන් වේ.

මෙම ඉල්ලුම වැඩිවීමත් සමඟ දෙසැම්බර් මාසයේ දී ඉහළ ලාභක් ලබා ගැනීමට ශ්‍රී ලංකාවට හැකිව ඇති බව ඒකාබද්ධ ඇඟලුම් සංගම් සංසදය (JAAF) විසින් නිකුත් කරන ලද දත්ත වලට අනුව පෙන්වා දිය හැකිය.

2024 දෙසැම්බර් මාසයට සාපේක්ෂව 2025 දෙසැම්බර් මාසය තුළ අමෙරිකාවට සිදුකළ අපනයන 6.49% කින් ඉහළ ගොස් ඇති අතර එය ඩොලර් මිලියන 178.29 ක් බව සඳහන් වේ.

එමෙන්ම යුරෝපා සංගමයට කළ නැව්ගත කිරීම් 6.76% කින් වර්ධනය වී ඇති අතර එය ඩොලර් මිලියන 141 ක් බවත්, එක්සත් රාජධානියට කළ අපනයන 12.95% කින් ඉහළ ගොස් ඇති අතර එය ඩොලර් මිලියන 55.12 ක ආදායමක් බවත් සඳහන් වේ.

කෙසේ වෙතත්, අනෙකුත් රටවලට සිදුකළ අපනයන 4.06% කින් පහළ ගොස් ඇති අතර එය ඩොලර් මිලියන 72.8 ක් බව කියැවේ.

ඒ අනුව, 2025 වසරේ ජනවාරි සිට දෙසැම්බර් දක්වා සම්පූර්ණ වසර කාලය සඳහා, මුළු ඇඟලුම් සහ රෙදිපිළි අපනයනය ඩොලර් බිලියන 5.02 ක් වූ අතර එය 2024 දී ඩොලර් බිලියන 4.76ක් බව සඳහන් වේ.

සමස්තයක් වශයෙන් 2025 වසරේ දී ශ්‍රී ලංකාවේ මුළු අපනයනය 5.42% ක් දක්වා ඉහළ ගොස් ඇති බවත් එය ඩොලර් මිලියන 258.18 ක වැඩිවීමක් බවත් වැඩිදුරටත් සඳහන් වේ.