යුද්ධය අවසන් කිරීම සඳහා වන සාකච්ඡා ඇණහිට ඇති බැවින් ඉරානයේ කාලය ගෙවී යමින් පවතින බව අමෙරිකානු ජනාධිපති ඩොනල්ඩ් ට්රම්ප් අනතුරු අඟවා තිබේ.
සිය තෘත් ගිණුමේ සටහනක් තබමින් අමෙරිකානු ජනාධිපතිවරයා සඳහන් කර ඇත්තේ ඉරානය ඉක්මන් කළ යුතු බවත් එසේ නොමැති වන්නේ නම් ඔවුන්ගේ කිසිවක් ඉතිරි නොවනු ඇති බවත්ය.
ඉරානය සහ එක්සත් ජනපදය සාම සාකච්ඡා සඳහා පාකිස්තානයේ මැදිහත්වීමෙන් පැවැත්වුණු නමුත් එම සාකච්ඡා එකඟතාවයකින් තොරව අවසන් විය.
මින් පෙරද එක්සත් ජනපද ජනාධිපති ඩොනල්ඩ් ට්රම්ප් විසින් සඳහන් කර තිබුණේ ඉරානය ගිවිසුමට එකඟ නොවන්නේ නම් ඔවුන්ගේ සමස්ත ශිෂ්ටාචාරයම මිය යනු ඇති බවය.
දෙරට අතර පැවැති සාකච්ඡාවලින් පසුව ඉරානය විසින් අමෙරිකාවට යෝජනාවලියක් ඉදිරිපත් කළ අතර එම යෝජනා තුළ යුද හානි සඳහා වන්දි ගෙවීම, හෝමූස් සමුද්ර සන්ධිය සම්බන්ධයෙන් ඉරාන ස්වෛරීභාවය අවධාරණය කිරීම ඇතුළු කරුණු රැසක් ඇතුළත් වූ නමුත් එක්සත් ජනපදය එම යෝජනාවලිය සඳහා එකඟතාවයක් පළ නොකළේය.
එමෙන්ම එක්සත් ජනපදයද ඉරානයට කොන්දේසි කිහිපයක් නියම කළ අතර එහි ඉරානය එක් න්යෂ්ටික මධ්යස්ථානයක් පමණක් ක්රියාත්මකව තබා ගත යුතු බවටත් එහි අධික ලෙස පොහොසත් යුරේනියම් තොගය එක්සත් ජනපදයට මාරු කළ යුතු බවටත් ඉල්ලීමක් ඇතුළත් විය.
කෙසේ නමුත් දෙරටවල් විසින් මෙම යෝජනා ප්රතික්ෂේප කළ අතර ඒ අනුව මෙතෙක් අවසන් එකඟතාවයකට එළැඹීමට එක්සත් ජනපදයට සහ ඉරානයට නොහැකි වී තිබේ.
