ආරක්ෂක හමුදා නිල ඇඳුම් වලින් සැරසී සිදුකිරීමට නියමිත ඝාතන තැතක් වලක්වා ගැනීම සඳහා ප්රභූ උත්සව සඳහා අනුයුක්ත කර ඇති ආරක්ෂක නිලධාරීන් නිවැරදිව හඳුනා ගැනීමට පියවර ගන්නා ලෙස උපදෙස් ලබාදෙමින් පොලිස්පති ප්රියන්ත වීරසූරිය විසින් ජ්යෙෂ්ඨ පොලිස් නිලධාරීන් වෙත යවන ලද අභ්යන්තර චක්රලේඛයක් පිළිබඳ තොරතුරු අනාවරණය වී ඇත.
මෙම සතියේ දී ජ්යෙෂ්ඨ නිලධාරීන්ට යවන ලද එම අභ්යන්තර චක්රලේඛයේ පොලිස්පතිවරයා සඳහන් කරන්නේ, ප්රභූ ආරක්ෂාවට ඇති වත්මන් තර්ජන සලකා බැලීමේදී, ත්රිවිධ හමුදාවේ, ශ්රී ලංකා පොලිසියේ හෝ වෙනත් ආයතන වල නිල ඇඳුමින් සැරසුණු අපරාධකරුවෙකු හෝ පුද්ගලයෙකු ප්රභූවරුන් සහභාගී වන විශේෂ අවස්ථාවලට ඇතුළු වී අපරාධයක් හෝ ජීවිත තර්ජනයක් සිදුකිරීමට ඉඩ ඇති බවයි.
එබැවින්, ජනාධිපතිවරයා, අගමැතිවරයා සහ අමාත්යවරුන් ඇතුළු සම්භාවනීය අමුත්තන් සහභාගී වන උත්සවවල ආරක්ෂාව සහ රථවාහන පාලනය වැනි අත්යවශ්ය රාජකාරි සඳහා සිය නිලධාරීන්ට පවරන විට, ආරක්ෂක හමුදා නිල ඇඳුම් ඇඳ සිටින අය නිවැරදිව හඳුනා ගැනීමට පියවර ගැනීම අත්යවශ්ය බව චක්රලේඛයේ අවධාරණය කර තිබේ.
ඒ අනුව, එවැනි උත්සවවලදී රාජකාරි සඳහා අනුයුක්ත කිරීමට නියමිත නිලධාරීන් කල්තියා හඳුනාගෙන ඔවුන්ගේ අනන්යතාවය සත්යාපනය කිරීම ඉතා වැදගත් බව පොලිස්පතිවරයා අවධාරණය කර ඇත.
විශේෂ රාජකාරි අවස්ථාවන්හිදී ආරක්ෂක කලාපවල නිලධාරීන් හඳුනා ගැනීම සහ වෙන්කර හඳුනා ගැනීම සඳහා විවිධ වර්ණ වලින් යුත් මැණික් කටු පටි, ලාංඡන හෝ වෙනත් සංකේත නිකුත් කිරීමේදී, මෙම කාර්යයන් පෙරට වඩා වැඩි අවධානයකින් සිදු කළ යුතු බව චක්රලේඛයෙන් උපදෙස් දී ඇත.
නීතිඥයෙකු ලෙස වෙස්වලාගත් තුවක්කුකරුවෙකු අධිකරණ ශාලාවකදී සැකකරුවෙකු ඝාතනය කළ මෑතකාලීන සිදුවීම් සැලකිල්ලට ගනිමින්, මෙම කාරණය නොසලකා හැරිය නොහැකි බව පොලිස්පතිවරයා නිලධාරීන්ට සිහි කැඳවා තිබේ.
