ජපාන රජයේ ආරාධනයකට අනුව එරට නිල සංචාරයක යෙදී සිටින ජනාධිපති අනුර කුමාර දිසානායක මහතා, අද (සැප්තැම්බර් 29) දින ටෝකියෝවේ අග්රාමාත්ය කාර්යාලයේදී ජපාන අග්රාමාත්ය ෂිගෙරු ඉෂිබා මහතා සමඟ රාජ්යතාන්ත්රික සාකච්ඡා පැවැත්වීමට නියමිතයි.
දෙරට අතර ද්විපාර්ශ්වික සබඳතා ශක්තිමත් කිරීම අරමුණු කරගත් මෙම හමුවේදී, ප්රධාන වශයෙන් ආර්ථික, ආයෝජන, සංවර්ධන සහයෝගිතා සහ ආරක්ෂක ක්ෂේත්රයන් පිළිබඳ අවධානය යොමු කරනු ඇත.
ජනාධිපතිවරයා සමඟ විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතා, ඩිජිටල් ආර්ථිකය පිළිබඳ ප්රධාන ජනාධිපති උපදේශක ආචාර්ය හාන්ස් විජයසූරිය මහතා සහ ජනාධිපති ජ්යෙෂ්ඨ ආර්ථික උපදේශක දුමින්ද හුලංගමුව මහතා ඇතුළු විදේශ කටයුතු අමාත්යාංශයේ ජ්යෙෂ්ඨ නිලධාරී කණ්ඩායමක් මෙම සාකච්ඡාවලට සහභාගී වීමට නියමිතව සිටිති.
ජනාධිපති දිසානායක මහතා මෙම හමුව පවත්වනු ලබන්නේ ජපානයේ උණුසුම් දේශපාලන පරිසරයක් තුළය.
ජපාන අග්රාමාත්ය ෂිගෙරු ඉෂිබා මහතා පසුගිය සැප්තැම්බර් මාසයේදී ධුරයෙන් ඉල්ලා අස්වන බව නිවේදනය කළේ, ජූලි මාසයේ පැවති ඉහළ මන්ත්රී මණ්ඩල මැතිවරණය ඇතුළු අඛණ්ඩව ලද මැතිවරණ පරාජයන් සහ පක්ෂය තුළින් එල්ල වූ දැඩි පීඩනය හේතුවෙනි.
දැනට, නව පක්ෂ නායකයෙකු සහ අග්රාමාත්යවරයෙකු පත් කරන තෙක්, ෂිගෙරු ඉෂිබා මහතා භාරකාර අග්රාමාත්යවරයා ලෙස තවදුරටත් සිය රාජකාරි ඉටු කරමින් සිටී. මෙම තත්ත්වය, රජයට පාර්ලිමේන්තුවේ සභා දෙකෙහිම බහුතරය අහිමි වීමෙන් පසුව ඇති වූවකි.
ඔක්තෝබර් 04 වන දින ජපානයේ පාලක ලිබරල් ප්රජාතන්ත්රවාදී පක්ෂයේ (LDP) නව සභාපතිවරයා තෝරා ගැනීම සඳහා නායකත්ව මැතිවරණයක් පැවැත්වීමට නියමිතය.
LDP සභාපතිවරයා ජපානයේ මීළඟ අගමැතිවරයා බවට පත් වුවද, පාලක සන්ධානයට දැනට පාර්ලිමේන්තුවේ බහුතරය නොමැති හෙයින්, විපක්ෂය වෙනත් නාමයෝජනාවක් ඉදිරිපත් කළහොත් නව අගමැතිවරයා තේරී පත්වීමේදී පාර්ලිමේන්තු මන්ත්රීවරුන්ගේ සහය තීරණාත්මක වනු ඇත.
